Лукашэнка аб МНПЦ хірургіі, транспланталогіі і гематалогіі: вас прызналі, хлеб не дарэмна ясце

Прэзідэнт Беларусі Аляксандр Лукашэнка адзначае паспяховае развіццё Мінскага навукова-практычнага цэнтра хірургіі, транспланталогіі і гематалогіі, перадае карэспандэнт БЕЛТА. 

Як было даложана кіраўніку дзяржавы, за апошнія гады асвоены многія новыя напрамкі, актыўна развіваецца і пазабюджэтная дзейнасць. У мінулым годзе не паўплывала нават пандэмія, і ён стаў самым паспяховым - цэнтр зарабіў больш за $10 млн - гэта 25 працэнтаў экспарту медыцынскіх паслуг краіны. Паслугамі беларускіх медыкаў карыстаюцца грамадзяне розных краін свету, у тым ліку з тэхналагічна развітых краін. 

"Велізарная колькасць пацыентаў з розных куткоў свету, не толькі з постсавецкай прасторы, але нават з такіх высокатэхналагічных краін, як Ізраіль альбо Японія, прыязджаюць да нас на лячэнне. Нават кавідныя праблемы не адыгралі ніякай ролі. Мінулы год стаў самым паспяховым. Мы зарабілі больш за $10 млн. Гэта больш як 70 працэнтаў экспарту медыцынскіх паслуг горада Мінска і 25 працэнтаў экспарту медпаслуг краіны. Колькасць пацыентаў з году ў год расце і ў мінулым годзе наблізілася да 2 тыс., якія прыязджалі да нас на лячэнне, - расказаў дырэктар МНПЦ Алег Румо. - Дзякуючы менавіта гэтаму мы істотна павялічваем аб'ём пазабюджэтнай дзейнасці ў агульным аб'ёме фінансавання нашага цэнтра. У мінулым годзе гэта Br30 млн. Для медыцыны гэта немалыя грошы. І, самае галоўнае, асноўную масу гэтых грошай мы інвесціруем у нашых супрацоўнікаў і нашу клініку". 

"Вось гэта галоўны паказчык вашай паспяховасці. Калі да вас паехалі людзі з такіх развітых у медыцынскіх адносінах краін, як Ізраіль і іншыя, значыць, вас прызналі, значыць, вы хлеб не дарэмна ясце", - сказаў Аляксандр Лукашэнка. 

Кіраўнік дзяржавы падкрэсліў, што ў свой час цэнтр быў створаны ў першую чаргу таму, што ў краіне былі кадры, здольныя развіваць гэты напрамак: "Ён быў створаны толькі дзякуючы таму, што вы гэта ўмелі рабіць. Калі б вы гэта не ўмелі рабіць, мы цэнтр не стваралі б. Але я тады ў гэту "бойку" ўвязаўся, адчуў". 

Алег Румо адзначыў, што для Беларусі гэта ўнікальны навуковы цэнтр. Адзіны ў краіне шматпрофільны навукова-медыцынскі цэнтр, у якім разам з высокімі тэхналогіямі развіваюцца абсалютна ўсе напрамкі сучаснай медыцыны, уключаючы гематалогію, анкагематалогію, трансплантацыю касцявога мозга і клетак. Акрамя таго, усе гэтыя тэхналогіі інсталіраваны ў звычайныя профілі - тэрапія, неўралогія і іншыя. "І з-за пандэміі COVID-19 нам давялося стаць і крыху інфекцыяністамі", - заўважыў дырэктар МНПЦ.

Другая асаблівасць гэтага шматпрофільнага цэнтра ў тым, што ў ім праводзяцца навуковыя даследаванні па ўсіх напрамках сучаснай медыцыны, зыходзячы з напрацовак, звязаных з транспланталогіяй. Распрацаваны і ўкаранёны ў практыку 188 новых метадаў лячэння і дыягностыкі, рыхтуюцца кадры вышэйшай навуковай кваліфікацыі. Адпаведна, заваяваны аўтарытэт у свеце і на постсавецкай прасторы. Напрыклад, вопыт беларускіх урачоў спатрэбіўся ў Казахстане, Арменіі, Грузіі. 

"Калі глядзець па колькасці аперацый на мільён насельніцтва, то мы робім іх больш, чым у Германіі, Польшчы, чым у краінах Балтыі. Мы ў тры разы больш іх робім, чым нашы калегі з Расійскай Федэрацыі, у восем-дзесяць разоў больш, чым казахстанцы. Галоўнае не гэта колькасць. А галоўнае, што гэтыя аперацыі даюць шанц на нармальнае жыццё вялікай колькасці людзей", - падкрэсліў Алег Румо. 

Цяпер на базе МНПЦ вядзецца будаўніцтва блока трансплантацыі касцявога мозга і ствалавых клетак. Праект рэалізуецца за крэдытныя грошы, завяршыць яго плануецца ў маі 2023 года. А ў верасні мінулага года ўведзены ў эксплуатацыю ультрасучасны корпус хірургіі і трансплантацыі, які ў тым ліку наведаў Аляксандр Лукашэнка. Алег Румо расказаў, што цэнтр узяў на сябе абавязацельства самастойна аплачваць працэнты па крэдыце, што з'яўляецца ўнікальнай практыкай для дзяржаўнай медустановы ў Беларусі.

Плануецца і далей развіваць на базе цэнтра ўсе адпаведныя напрамкі. "Гэта высокатэхналагічная медыцынская дапамога. Мы плануем удасканальваць навуковыя даследаванні, развіваць амбулаторную медыцынскую дапамогу. З адной толькі мэтай - палепшыць якасць аказання дапамогі жыхарам Рэспублікі Беларусь. Ну а калі на гэтым яшчэ атрымаецца зарабіць, то і, вядома, гэта будзе дапамога і для краіны, і для нашай установы, і для ўсёй сістэмы аказання медыцынскай дапамогі", - расказаў Алег Румо. 

Аляксандр Лукашэнка на гэта заўважыў, што не трэба так нясмела гаварыць аб фінансавым аспекце. "Мы так нясмела, і ты таксама, Алег, гаворыш, што зарабіць... Ва ўсім свеце зарабляюць на гэтым. Але мы, вядома, людзі такія дабрадушныя, славяне, нам нібыта і няёмка на здароўі зарабляць. Але пытанне нават не ў заработках, а каб гэтыя грошы нашы людзі не вывозілі ў Германію, яшчэ куды-небудзь. Таму тут трэба рабіць гэтыя аперацыі, умяшанні і іншыя высокатэхналагічныя рэчы. У гэтым сэнс маёй падтрымкі і дзяржавы ў цэлым", - падкрэсліў беларускі лідар. 

Яшчэ адзін важны напрамак, дзе патрэбна падтрымка асабіста Алега Румо і сталічных спецыялістаў, - развіццё адпаведнай медыцынскай дапамогі ў абласных і міжраённых цэнтрах. "Каб у кожнай вобласці і ў міжраённых цэнтрах (розныя будуць там аперацыі) мы навучылі людзей працаваць. І каб не скнарнічалі нашы - тыя людзі, якія ходзяць пад богам (размова аб высакакласных спецыялістах. - Заўвага БЕЛТА), і навучалі моладзь, каб у нас больш і больш было такіх", - сказаў Аляксандр Лукашэнка. 

Цяпер структура Мінскага навукова-практычнага цэнтра хірургіі, транспланталогіі і гематалогіі прадстаўлена 11 клінічнымі аддзеламі і 61 аддзяленнем. На функцыянальнай аснове на базе цэнтра ажыццяўляюць дзейнасць 6 рэспубліканскіх цэнтраў. 

За перыяд з 2008 па 2021 год выканана больш за 3 тыс. трансплантацый органаў. Цэнтр з'яўляецца адным з буйнейшых ва Усходняй Еўропе. Па колькасці трансплантацый Рэспубліка Беларусь знаходзіцца на першым месцы ў СНД, апярэджваючы па гэтым паказчыку Расію больш як у 3 разы, Украіну - больш як у 8 разоў, Казахстан - больш як у 10 разоў. Колькасць замежных пацыентаў, якія прыязджаюць на лячэнне з 2008 года, павялічылася больш як у 18 разоў.

У верасні 2021 года ўведзены ў эксплуатацыю корпус хірургіі і транспланталогіі на 170 ложкаў. У сувязі з гэтым арганізавана работа кардыятаракальнага аддзела з развіццём новага для цэнтра напрамку сасудзістай хірургіі: адкрыта новае аддзяленне экстракарпаральнага кровазвароту з гібрыднай аперацыйнай, што дало магчымасць значна палепшыць дапамогу пацыентам з кардыяхірургічнай паталогіяй. 

У адпаведнасці з распараджэннем Прэзідэнта ад 3 сакавіка 2020 года рэалізуецца інвестыцыйны праект па будаўніцтве блока трансплантацыі касцявога мозга і ствалавых клетак. 

Не менш важным і перспектыўным напрамкам развіцця цэнтра з'яўляецца ўкараненне тэхналогіі татальнага апрамянення цела, якое прымяняецца пры трансплантацыі касцявога мозга ў дзяцей і дарослых. Для гэтага закуплены за кошт сродкаў рэспубліканскага бюджэту радыетэрапеўтычны комплекс прынцыпова новага тыпу, пастаўка якога плануецца ў першым паўгоддзі 2022 года. Гэта тэхналогія дасць магчымасць істотна палепшыць вынікі аказання медыцынскай дапамогі пацыентам розных узроставых груп з анкалагічнымі і анкагематалагічнымі захворваннямі. Цяпер на постсавецкай прасторы ўстаноўлены толькі 2 такія апараты.